حفل ختام حمله حماية
السلام عليكم .......... حملة حماية .. أكيد سمعت عن الحملة دي …. ولو مسمعتش أقدر أقول لك
حملة حمايه …. حملة على مستوى الوطن العربي كان هدفها …لتشجيع علاج 5000 مدمن على مستوي الوطن العربي
( لله الحمد والمنه وصل عدد المتصلين بالكول سنتر وعدد الحالات 7500 حالة )
يعنى تم تحقيق الهدف وأكثر … فالله الشكر ولله الحمد والمنه … وكما يقال من لم يشكر الناس لم يشكر الله
فاسم مدونه الشاعر
أشكر
كل المدونين الذين شاركوا فى الحمله سواء بالدعايه الالكترونيه على النت أو بالنزول للشارع
والمشاركه بالفعل مع صناع الحياه
أشكر
كل صناع الحياه على مستوى الوطن العربى وفى مصر بالاخص وبالتحديد فى المنصورة .. واعمل زوووم على فريق حمله حمايه بميت غمر ( أحلى شباب وأحلى بنات )
أشكر
كل من ساهم معانا ولو بكلمه … شكر أو تشجيع ….. كما أشكر من انتقدنا باسلوب مهذب
أشكر
كل المؤسسات التعليميه التى شاركت معانا فى الحملة
بقول أيه .. انا مش عاوز اطول عليكم … انا جاى اتكلم عن حفل الختام … تعالوا نشوف الاحداث بعنينا
بدايه الحفل كانت أيات من كتاب الله الحكيم بصوت شاب من صناع جمعيه سما .. ماشاء الله عليه كان صوت جميل لدرجه ان الشباب صفقوا له بعد ما خلص .. وهو شىء اثار سخطى بس خير عديها
بعد كدا كان دور الدكتور / أحمد زعفان وقدم الدكتور كل الدول العربيه
( الجزائر – اليمن – السعوديه – الامارات – السودان – مصر وكثير من الدول العربيه اللى لم تقدر على الحضور )
وماشاء الله كل واحد من الدول العربيه قال كلام جميل جدا ... بس الملفت للنظر ان كل من دوله
( السعوديه – الامارات – الجزائر )
سيدات وهو ما أكد عليه أ عمرو خالد ان ماشاء الله فى الحمله دى كانت همم النساء عاليه جدا
فاحنا من هنا بنشكر النساء اللى قطعوا المسافات الطوال لحضور مثل هذا الحفل
جاء بعد ذلك كلمه الاستاذ عمرو خالد
وبعد التصفيق الحار له .. ما ان بدأ فى الحديث وكأن على رؤس الحاضرين الطير ...وبدأ بالشكر لكل من ساهم فى الحمله ... سواء من صناع الحياه او غيرهم ... وذكر اسماء عديدة يصعب على ذاكرتى حصرها .. ولكن ممكن نسمعها مع بعض فى الفيديو ان شاء الله .... (بس دعواتكم لأن النت عندى خلاص جاب أخره معاى )
المهم .. أكد الاستاذ عمرو على شىء الا وهو ان حمله حمايه لم تنتهى بعد ... بس اللى انتهى هو دورنا ... كان دورنا نصحى الناس ونفتح عنيهم على المشكله والحمد لله دا تم
وأكد اننا لنا مشروع نهضه كبير ... فموضوع المخدرات دا جزء من النهضه ( النهضه الصحيه )
واشار بدون قصد ان الحمله القادمه من المفترض ان تستهدف الجانب التعليمى والاقتصادى ولكنه ترك العنان للشباب ان تفكر فى الحمله الجديدة وكيفيه تنفيذها واهدافها
طبعا مش كل دا الكلام اللى قاله الاستاذ عمرو فى كلام كتير ماشاء الله محفز ومشجع للشباب وتهنئتهم بالنجاح فى الحمله وان شاء الله نسمعه فى الفيديو
بعد كلمه الاستاذ عمرو جاء عرض فيلم قصير اتعرض فيه كل انجازات صناع الحياه بمصر فى مجموعه صور
طبعا كل محافظه اول ما يجى صورها ... تهيص القاعه
بس انا بقى بشكر اللى عمل الفيديو دا ... مش علشان هو كويس
علشان كل صور الدقهليه ... صور من ميت غمر وكما لنشاط واحد
يلا خير
المهم كنت هنسى ومش اقول لكم ...شرفنا بالحضور الفنان / يحي حوي .. حد عارفه ... طيب اللى مش عارفه
دا الموقع الشخصى بتاعه ممكن تتعرف عليه أكثر
الفنان يحي غنى أغنيه خصيصا لحمله حمايه ... ألحان الفنان / ايمن الحلاق
هى كانت باللغه العربيه الفصحى بس دا كان أجمل حاجه فيها
وبعد يحي حوي ... شرفنا وامتعنا ايضا الفنان المنصورى ... من صناع المنصورة .. الفنان / عبد العظيم
اسمع اغانيه من هنا
وعبد العظيم سمعنا اغنيه جميله من اغانيه ... اسمها يلا نحلم ... وان شاء الله معاى فيديو
( النت ربنا يهديه وارفعها ان شاء الله )
جاء بعد ذلك تكريم الدول العربيه .... وبعدها تكريم فرق صناع الحياه بجمهوريه مصر العربيه
بقول ايه تعالوا نتفرج مع بعض على بعض الصور وربنا المستعان
ونأسف على سوء الاضاءة وصعوبه الحركه فى المكان
حضور مشرف من جانب شباب صناع الحياه
كلمه أ عمرو خالد فى الحضور
الشاعر والفنان يحي حوي
الشاعر والدكتور أحمد زعفان .. مسؤل الحمله على مستوى الوطن العربي 
الشاعر يتوسط .. مسؤل حمله حمايه فى السودان وفى الجزائر 
الشاعر ومسؤل حمله حمايه فى فلسطين
الشاعر وأحد المدمنين ... متعافى ومعالج الان
صورة جماعيه لبنات صناع الدقهليه مع الاستاذ عمرو خالد 
تكريم أ عمرو خالد لصناع الحياه بالبلاد العربيه 
د أشرف الاتربى وعمر عبد الدايم ... فريق حمله حمايه بميت غمر
أخيرا أخوكم .. بشهادة التقدير المقدمه من الاستاذ عمرو
تسلم ايديك ويا رب تزيك اكتر من كده يا شاعر وكل شباب بلدنا يتعالج وتبقى زى الفل
ردحذفمبارك هذا النجاح الرائع.ماشاء الله الحملة رااااائعة بمعنى الكلمة. والبوسترات منورة الشوارع وكل مكان. والحفلة شكلها كان رااائع كنا نتمنى نحضر
ردحذف.وان شاء الله مزيد من النجاح والتقدم
يااااااااا اخيرا نزلت الصور
ردحذفانا كنت مستنياها من يوم الحفلة
بس عموما
شكرا جزيلا
وعقبال كدة الحملات القادمة ان شاء الله
الأخ الشاعر
ردحذفالسلام عليكم
جزاكم الله خيرا على جهودكم في الحملة .. كا نفسي أكون معاكم ولكني خارج الوطن في الوقت الحالي .. ولكني أسهمت بجهد متواضع في الحملة في مدونتي منذ بدايتها ..
تحياتي
said
جميل والله .. حملة رائعه ونتائجها ممتازة ويكفي تفاعل الحكومات معها
ردحذفكل التحية والتقدير لكل من ساهم فى الحملة
وربنا يوفق الجميع
السلام عليكم
ردحذفما شاء الله ربنا يبارك فيك وجعل هذا فى ميزان حسناتك وربنا يبارك فى مجهودك فى الحمله ويعله فى ميزانك ان شاء الله وربنا ينفع مصر بالحمله دى
بسم الله
ردحذفشئ عظيييييييييم جدااااااورائع ايضا ومفرح اوى اوى كمان
ربنا يباركلك دايما يارب مشوار طويل وصعب بس ربنا يكرمكم جميعا
تحياتى ليك والاستاذ عمر خالد والف مبروك على هذا النجاح
تقبل مرورى
جيلان
أزال المؤلف هذا التعليق.
ردحذفوالله حملة كانت رااائعة جدااا
ردحذفوالشباب كانوا أحسن
تشكر على البوست
انا كان نفسى اتقابل مع يحيي حوا
أخووك
ماشاء الله
ردحذفمدونةٌ هذي أم ثورةٌ مجتمعيه
لم اكن اعلم ان لك مثل هذا النشاط العالى الهمة في كل تلك المجالات
تحياتي
وتمنياتي بمزيد من النجاح
السلام عليكم ورحمة الله وبركاته
ردحذفجزاكم الله خيرا وبارك فيكم وحفظكم للامه الاسلاميه يا صناع الحياه
ممكن حد يتفضل شاكرا ويعطينا ارقام جمعيات صناع الحياه الموجوده بالدقهليه
بارك الله فيكم وجزاكم بالجنه