في جيبي مدونه

في جيبي مدونه

من الآن تستطيع أن تسافر وتقطع المسافات الطويلة وبصحبتك مدونه ( blog ) بدون ما يكون معاك لاب توب ولا محتاج وصله نت (ب 30 جنيه وتشتغل يوم وتفصل يومين ولا حتى وير لس)

واحد ممكن يسألني ... طب جميل جدا .. بس أزاي ؟؟

زى الناس ... المدونين عملوا كتاب اسمه ( مدونات مصريه للجيب ) .. والكتاب عبارة عن بلوج صغير في جيبك أو شنطنتك يحتوى على مجموعه كبيرة جدا من البوستات (المقالات – الخواطر – الشعر ) لمجموعه كبيرة من المدونين من مختلف الاتجاهات ولكن جمعهم حب الوطن

وكان تسميه الكتاب

( مشروع وطن .. إلي المغتربين خارج مصر وداخلها نهديكم كلماتكم)

فمن الآن تستطيع أن تقرأ أفكار المدونين وكتابتهم وليس لك عذر بعد اليوم .

وتحقق الحلم

تحقق الحلم وصدر الكتاب وكان حفل التوقيع أمس الخميس الموافق 22/7/2008 بمكتبه عمر بوك ستورز بوسط البلد

حفل التوقيع

طبعا الميعاد كان الساعة 6 ونص بس لظروف المواصلات أتأخرت شويه .. بس أول ما دخلت المكتبة مش عاوز أقول لكم كميه بشر ومدونين ما شاء الله جميله جدا .. وأنا كنت طالع مخصوص أبارك واسلم على بعض أصدقائنا اللي مشتركين في الكتاب ولكن الدنيا زحمه جدا .. وكل خطوة اتكعبل في مدون ... وللأسف علشان المدونة مليانه صور لي فالكل عارفنى .. المهم سلمت على أكثر عدد من المدونين بقدر المستطاع

ونزلنا على قهوة البور صه

وهناك بقى كان تقريبا معظم الناس اللي شاركت في الكتاب .. قعدنا معاهم وباركنا لهم وتناقشنا في موضوعات عده

واتعرفت عن قرب

واتعرفت عن قرب علي ناس جميله جدا كان نفسي أقابلهم من زمان ... وبجد كان يوم جميل بكل المقاييس

مبرووووك

ومن المدونة بنقول لكل مدون شارك في الكتاب ألف مبروك .. كلماتك هتوصل للناس فى الشارع .. أسأل ربنا الإخلاص .... ربنا هيبارك وهتوصل لكل الناس

شويه ملحوظات

** كان نفسي يكون الكتاب فى حجم الجيب فعلا .. اعتقد كان هيكون أجمل

** الغلاف بتاع الكتاب زحمه أوووى ... ممكن الإنسان العادي اللي إحنا عاوزين نوصل له ... من زحمه الغلاف مفهمش إيه موضوع الكتاب .. بس ارجع وأقول تجربه جيدة

** لو كان عدد المدونين يقل شويه أو يكون عبارة عن سلسله من الكتب وتتقسم على المدونين علشان الكل يعرف ياخد مساحه كافيه وأكيد كل مدون كان عنده أكثر من بوست عاوز ينشرة ومتحير بينهم

** سعر الكتاب 4 جنيه ودا شيء كويس جدا علشان كل الناس تشتريه بس خايف يغلي بعد كدا الناس ممكن تفقد الثقة

نقد بناء

شويه الملحوظات دي ماهي إلا نقد بناء ... وأسأل الله أن يبارك لكل مدون أخلص النية لله فى كل كلمه قالها أو ببقولها أو هيقولها ... ومتجمعين على حب الوطن يا مدونين

حكمه البوست

اختر كلامك قبل أن تتحدث وأعط للاختيار وقتاً كافياً لنضج الكلام فالكلمات كالثمار تحتاج لوقت كاف حتى ننضج

شويه صور

جانب من الحضور

مدون يوضح فكره بوست له عامل لبس عند البعض وبجواره يحي هاشم

على البورصه .. الشاعر وبعض المدونين المشاركين فى الكتاب

صورة من بعيد للمدونين

الشاعر وامام الجيل

الشاعر وأبو اعصار .. وهو بالمناسبه صديق لى من قبل التدوين وهو سعودى المعيشه من صغرة بس اب وام مصريين

صديقى المدون نوشه على البورصه

محمد الشاعر
23/5/2008