كل سنه وإضراب جديد ياريس

بكرة 4 مايو

طبعا انا مجبتش جديد ... طيب نفكر الناس اللى عرفين ونعرف الناس اللى مش عارفين

4 مايو

يوم ميلاد الرئيس محمد حسنى مبارك

يعنى عاوزين نعمل له أحلي عيد ميلاد فيكى يامصر

4 مايو

يوم ميلاد نائب المرشد العام للأخوان المسلمين ... محمد خيرت الشاطر

والكل عارف الراجل دا اتحكم عليه ب 7 سنوات هو والمهندس حسن مالك .. من مين من الراجل اللى هنعمل له عيد ميلاد بكره

4 مايو

حفله هيعملها الشعب المصرى كله بمناسبه عيد ميلاد الرئيس

طيب حد هيسأل هنحتفل ازاى بالسيد الرئيس

هنفضل فى البيت ... يعنى ايه ... هنعمل اضراب حضارى سلمى .. علشان ميطلعش علينا واحد يقول ... تخريب وأهدار لمقدرات البلد اللى هى أصلا منهوبه

طيب حد يسأل

أنا عندى امتحان يوم الاحد ... لا روح امتحانك واكيد هترجع قبل الساعه 9

طفى النور فى البيت من الساعه 9 الى الساعه 10 وأهو أحتفال على أضواء الشموع ... علشان نحس بالناس فى غزة شويه ... وتبقى ليله سودا على دماغ الرئيس

بجد الواحد مش متخيل لو الشعب كل تفاعل مع الاضراب الثانى للشباب المدونين والاخوان وعملوا كدا فعلا ... هيبقى يوم أسود فعلا على كل فساد فى مصر

خلينا نجرب .... وياروح ما بعدك روح ... واللى خايف يروح أو ينام

هتقول لى انا دكتور ... وفى الاستقبال ... هنقول لك روح المستشفى علشان دى اروح ناس .... وتعالى ومتنساش تطفى النور علشان نقطع التورته للسيد الرئيس

وبجد أحسن هديه قلت أهادى بيها السيد الرئيس فى عيد ميلاده .... كانت القصيدة دى لعمنا نجم .... بصفتى بحب الشعر شويه

سيدي الرئيس
في عيد ميلادك التمانين
كل سنة وانت طيب
واحنا مش طيبين
كل سنة وانت حاكم
واحنا محكومين
واحنا مظلومين
واحنا متهانين
ويا تري يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
الله يكون في عونك - ها تفتكر مين وللا مين
في عيد ميلادك التمانين
بقول لك كلمتين

الأوله
شيلتنا طين
وهل تعلم أن النيل بقي رشاح
والجو أصبح بيئة والعيشة ولعة
والشرفا قلوبهم عالبلد والعة
وانت عاملهم مذبحة ولا بتاعة القلعة
والإقتصاد سداح
والسرقة بقت كفاح
ومصر متاحة بس للسياح
وعرض البلد بقي مستباح

والثانية
ورتنا الويل
دا الخطوة في عهدك بقت ميل
والضحك بقي نواح وعويل
والكوسة
عارف الكوسة
ممكن أقول لك فيها مواويل
والجامعة بقت يا إما كباريه أو دار مسنين
والشباب معظمهم من غير خمرة سكرانين
والعلم عز علي المتعلمين
والأساتذة بقم دجالين
والقادة بقم طبالين
واديني في الهايف يا حبيب الملايين

والثالثة

عارف اليابانيين
زمان في سنة اتنين وخمسين
كان عندنا تروماي وكان عندنا علم ومتعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسه مضروبين
وللصدقة مستحقين
دلوقتي إحنا فين وهما فين
هما فوق واحنا في أسفل سافلين

والرابعة

أمن بلدنا بقي تنين
والمحاكم اتملت مظالم
والعدالة بقت كمالة
وكلمة الحق في الزبالة
وأصحابها في الزنازين
والخامسة
القطاع العام....عام
والفساد.....ساد
وفي جتة بلدنا بيرعي
أفتكر لجنابك إيه وللا إيه
وكل ذكري ليك بدمعة
آآآآآآآآه آآآآآآآآه
أنا كنت حالف ميت يمين
أكملهم لك تمانين
بس ها كفيهم ورق منين
وكل سنة وانت .............
واحنا طيبين

وصحيح من هذا الموقف ... بنشكر الاخوان وقيادات الاخوان المسلمين ... علشان استجابت لدعوة اضراب الشباب ... وبكرة لو شفنا حد من الاخوان فى الشارع هنبلغ عنه ... او ممكن نقول ان الاخوان تصريحات والسلام

وكل سنه وانت طيب ياريس ... وكل سنه واضراب جديد .... والله انا حاسس انك هتفضل عايش لأضرابات أحفادنا .... مش هيهم ... المهم ان الشعب بدأ يفوق ... ويتكلم بعلو الصوت ... زودت المرتبات على الاساسى 30 % ولو زودته 100 % الشعب مظلوم ..... الشعب مقهور ... بيشوف الظلم بعينه ويحسه بجوارحه

كل سنه واضراب جديد ياريس

موضوع له صله : أثناء كتابه البوست جاءنى عبر الميل هذة الرساله

عدد من الأحزاب الصغيرة.. تنظيم مؤتمر لمحاكمة القوى السياسية الداعية للإضراب في عيد ميلاد الرئيس

وانا ارد وأقول .... لا تعليق

فى النهايه .. تحيه لأبطال ومعتقلى 6 أبريل وعلى رأسهم ضياء الصاوى والمدون كريم البحيرى.. وكريم مدون من مدونى الدلتا ... والعجيب ان مدونين الدلتا ولا حس ولا خبر ولا كأنهم يعرفوا حد بالاسم دا .... صباح التجمعات التدوينيه .... سلام عليكم

محمد الشاعر

اليوم اللى قبل اضراب 4 مايو ... لعله يسجل فى تاريخ انتفاضه الشعب المصر