تاجين مرة واحده

التاج الاول من الدكتور / هانى
صاحب مدونه
بحب الحريه

والتاج الثانى من الاخت دينا
صاحبه مدونه
دينا عمر



التاج الأول على بركه الله

لومكنتش مصري بس عربيكانت هتبقى إيه نظرتك للمصريين واللي بيحصل في مصر دلوقتي؟

لو مكنتش مصري ... هاجى اعيش في مصر واخد الجنسيه .. حد يطول يبقى مصرى
نظرتى للمصريين .. ناس جدعان ورجاله وولاد بلد
اللى بيحصل فى مصر... هو فى حاجه بتحصل فى مصر .. احنا زى ما أحنا من 26 سنه
وياعالم هيفضل لحد أمتى


لوكنت أوروبي أو غير مسلم
بردو إيه نظرتك للعرب والمسلمين؟

ايه ياسيدى الاسئله دى
المهم
لو لو ... مع انها الو دى بيقولوا من الشيطان
بس لو انا غير مسلم .. والحمد لله على نعمه الاسلام
مسلمين اليومين دول وعرب اليومين دول ... كنت ممكن اخد وقت على ما أفهم يعنى ايه الاسلام ويعنى ايه العروبه ووحدتها
بس اكيد كنت هقرأ واشوف سير السلف وسيرة رسول البشريه
وان شاء الله ما كنت هتردد الدخول فى دين الله لحظه



لوقالولك إنت بقيت رئيس جمهورية هتعمل إيه؟

لا انتوا بتحلموا بجد
وايه يعنى منحلم .. هو الحلم حرام وعيب ولا ممنوع الايام دى
تصدق
الاحلام ممنوعه الايام دى .. بجد ممنوعه
حتى النومه محدش عاد فينا بياخد راحته ويحلم
ليه ؟؟ الكل عارف

بس هحلم انى رئيس جمهوريه
هعتقل الشعب
واعيش لوحدى
زى الزعيم

ياعم رئيس ايه .. دا انا مبحبش اقف امام فى المسجد .. بخاف على نفسى


عمر الفاروق بيقول
والله لو تعثرت بغله فى العراق والله لسئل عليها عمر لما لم يمهد لها الطريق

بغله ... لمو أخذة حمارة أو حمار ... اتكعبل فى طوبه .. عمر رضى الله عنه هيتسئل

تعالوا شفوا بقى أسر فى شوارع القاهرة فى عز البرد نايمه على الرصيف



لوكان ينفع ترجع طفل تاني وتخليك طفل علطول هترجع؟ وليه؟


حرجع وحرجع وحرجع


ليه ايه ياعم .... على الاقل هتعيش مررررررررررررراتح البال .. لا مستقبل ولا حاضر ولا ماضى

لوإنت طبيب وعندك مريض ميؤوس من حالتهأيهما تفضلإنك تصارحه بالوضع وتقوله كل شيء بأمر الله في الاخرولا تغرس فيه الامل لغاية لما يموت؟

لا هقول له روح لدكتور تانى

ايه ياجدعان الاسئله دى

أمل وعمر ودكتور


لوسمح لك برؤية الرسول عليه الصلاة والسلام وإنك تقوله كلمة واحدة بسأو جملة واحدة بسهتكون إيه؟

أسأل الله مرفقتك فى الجنه

لوخطبت واحدة أو اتخطبتي لواحدوأثناء الخطبة اكتشفت أو اكتشفتي إن الطرف الآخرغير قادر على الإنجابهيكون تصرفك إيه؟

وايه المشكله
هو الجواز خلفه وخلاص
وكمان يما شوفنا ناس فضلت سنين متخلفش وربنا كرمهم لما صبروا

لوكنا في عصر ازدهار الأندلس كنت تتخيل نفسك إزاي؟

كنت اتخيل نفسى واحد من الناس زى اى الناس

دى باين اغنيه

معلشى جعان وانا بجاوب على التاج

بس عادى متخيل نفسى جندى فى جيش محمد الفاتح

لوأنا مررت التاج ده لحد وما جاوبش عليهأعمل فيه إيه؟

هعتقله فى الحال
وتهمته انه
لم يجاوب على التاج
وفى طرق للتعذيب جديدة
ههديها لكل اقسام الشرطه وامن الدوله


التاج الثانى على بركه الله



كنت طالب شاطر في المدرسة؟

ايوة ولله الحمد
فى الابتدائى كنت قاعد فى تانى درج
ودا فى الابتدائى يعتبر من الاوائل
فى الاعدادى ولله الحمد كنت كل سنه باخد شهادة تقدير كنت بكون من العشرة الاوائل بس عمرى ما كنت الاول
فى الثانويه العامه .. انقلبت الموازين شويه ... مراهقه بقى
دخلنا كليه التربيه النوعيه .. قسم الحاسب الالى .. بعد ما حولنا من علوم قنا ... ولله الحمد
دلوقتى ... خلصت الكليه بتقدير .. جيد جدا .. منتظر الجيش وبعدها نقدم .. تمهيدى للماجستير .. دعواتكم

ايه كانت أحب مادة ليك في المدرسة و الكلية؟

في المدرسه كنت بحب اللغه العربيه
فى الجامعه كنت بحب البرمجه والرياضه

أكره مادة ليك في المدرسة و الكلية؟

فى المدرسه مكناش بنكره حاجه لأننا كنا بنحفظ كله
فى الكليه بقى
فى مادة اسمها تخيطيط البرامج بكرهها وبكره دكتورها الله ينتقم منه مطرح ما يروح
بس قلبتوا علينا المواجع

كنت عايز تطلع ايه و انت صغير؟
وانا صغير

ازاى هطلع وانا صغير

اه حلمى وانا صغيرى لما أكبر يعنى

كان نفسى أكون مهندس علشان كانت رغبه فى وعند ماما .. بس الحمد لله

أغرب حاجة اتمنيتها هي إني ابقى؟
مش واخد بالى
يعنى حاجه اتمنتها وطلعت غريبه .. افهم كدا يعنى

لا مفيش ... او مش فاكر

اسم مدونتك؟
اسمها الشاعر
Alsha3r.blogspot.com
علشان انا الكنيه بتاعتى كدا بين اصحابى واحبابى
وفى حين ان انا بحب الشعر والقائه وبعضه الغنائى المتواضع اكتبه
وكمان لما جيت احجز وافق على الاسم
بس

هل فكرت في اغلاق مدونتك؟ و السبب
صراحه .. فكرت كتير
والسبب ومحدش يزعل بعض المدونين
وبلاش نتكلم علشان الموضوع كبير شويه
بس الناس الكويسين فىا لتديون بيهونوا علينا

صورتك فى المدونة رمزيتها؟
صورتى
صراحه انا بغيرها من الحين الى الاخر
اصل انا بعيد عنكم بحب التصوير اووووووووووى
فتلاقينى بصور اى حاجه
وبتصور كتير
وعلى فكرة كل صورة لى مختلفه عن التانيه تماما

أحلى جملة قيلت لك في وصف مدونتك؟
والله مفيش .. بس غالبا الشباب اللى بيخش كلهم زوق.. بيقولوا كلام كويس ...ودا من زوقهم .. مش ان مدونتى يعنى حلوة اووى

التعليقات بالنسبة لك. أهميتها؟
مهمه ومش مهم
مهمه لو موضوع محتاجين نعرف راي كل واحد فينا ايه
ومش مهم لما يكون الموضوع عادى وعام
ويكفينا واحد بس يشوف التدوينه
يااااااه لما تأثر فى واحد وتغير عنده فكرة او مفهوم او تسمعه حاجه حلوة
او يبقى موجود عندنا وهو سعيد او يبقى عاوز يقعد اكتر او ينقل شىء من اللى انت كاتبه
كفايه على الواحد
بس طبعا كل ما كانت التعليقات موجودة وفى تفاعل الواحد نفسه بتفتح للتدوين والكتابه
مع ان الاصل الواحد بيعمل وعلى الله الاجر والثواب بس ممكن تقول نوع من التعزيز

ما احلى بوست كتبته ضع اللينك واذكر لماذا؟
والله مقدرش احدد بوست بعينه

احلى مدونة قريتها؟
صراحه كتير جدا ومش عاوز اذكر حد وانسى حد .. كل المدونات والمدونين اللى بيحترمونا وبيحترموا انفسهم فى كل كلمه بيكتبوها وبحس بالصدق فى كلامهم .. بتعجبنى .. سيبك بقى من التصميم والابيرنس بتاع المدونه .. اللى يهمنى أكتر المضمون

حد قل ادبه فى التعليق وعملت ايه؟
لا صراحه الى الان لم يحدث

ايه اللى هيحصل لايميلك لما تموت؟
مش عارف

اديت الباسوورد قبل كده لحد؟
ايوة
أختى وماما بيخشوا عليه
من على جهازى على طول

اسمك؟
مين
والله ما انا
انا أخوكم محمد الشاعر

اسم الدلع المشهوره بيه وسط اصحابى؟
الشاعر ... عطيه ... حماده

مجال دراستك؟
الحاسب الالى

شخصيتك نوعها ايه؟
انا هادى جدا .. بحب الهدوء فى بعض الاحيان
وبحب الدوشه والهيصه فى احيان اخرى
حساس لدرجه ممكن تكون رخمه شويه
يعنى هتكلم عن نفسى كتير ... كفايه كدا عليكم التاج دا
مودك ايه؟
بجد
انا مودى جدا
يعنى لما بكون فرحان ... ببقى حاجه جميله خالص
على عكس لما اكون مضايق ممكن اعمل حاجات مش طبيعيه خالص
ربنا يعافيكم ياارب

بتعمل ايه فى وقت فراغك؟

النت ثم النت ثم النت

الاكلة المفضه؟

المكرونه والفراخ

السفر بالنسبه لك؟
بعشق السفر

صفات اخدتها من بابا؟
مختش منه حاجه ... الا شكله بس ..وعينه الخضرا .. غير كدا انا وهو فى اتجاه .. حتى أيام الانتخابات .. اقسم على لو مشيت مع مرشح الاخوان .. لا انا ابنه ولا هو يعرفنى شوفتوا ..قلب الاب بقى

صفات اخدتها من ماما؟

ماما بقى اخدت منها كل شىء
الطيبه
الرقه
الحب للناس
بجد ماما حتى دلوقتى احسن منى فى حاجات كتير
العبادات ... والنوافل
كفايه ياجدعان انها شافت الحبيب حبيبنا رسول الله فى المنام
وبجد دمعت عيناى مرة .. لما كانت نايمه معاى وانا بذاكر ... بتسلينى يعنى .. وفى عز نومها ووجدتها بتقول .. لا اله الا الله .. وتسبح ربنا .. ندهت عليها ماما ماما بحسبها صاحيه .. يتضح لى انها نايمه


اكتر 6 حاجات بكرهها؟
التكلف ... الانسان اللى يعيش توب مش توبه
الكدب ... الانسان اللى يكدب ويصدق نفسه
الخداع .. الانسان اللى بيخدع الناس بكلامه
عدم فهم الدين .... اكتر شىء يبعد الناس عن الدين
النت ... بوظ كل اجتماعتى
وحاجه كدا أحتفظ بيها لنفسى

الشغل بالنسبه لك؟
الشغل بحس فيه بالمتعه مع انه متعب
الكمبيوتر والنت بالنسبالك؟
زى الميه بالنسبه لى ... بس اوقات بينرفزنى
تمرر التاج لمين؟
كل اللى يعدى هنا ... وفاضى ... وعنده وقت يجاوب ... ابقى سعيد لو جاوب