يوم من حياتى

يوم من حياتى

كان يوم السبت الموافق19/1/2008 كان فى حفله لفريق الوعد فى ساقيه الصاوى بالزمالك حد عارفها؟؟
المهم
انا عرفت عن الحفله دى من موقع استاذنا عمرو خالد ثم عرفت التفاصيل من مدونه الفنان مصطفى محمود
اللى هو الريس بتاع الفرقه يعنى
المهم
انا طبعا بحب مصطفى محمود من زمان ومفيش حاجه عملها الا لما سمعنها
وصراحه زى ما قلت فى بوست عن الفن اتكلم
الفنان مصطفى فنان لما تسمعه بيرتقى بيك لفوق
مش بينحط بيك لتحت

المهم

نويت اروح الحفله وقلت دا فن هادف وراقى ندعو المدونين وبالفعل دعوت المدونين
وكان اول واحد فيهم وأتاخر شويه على فى المحطه بس حد لذيذ ربنا يكرمه
هو

اخوانا المهندس سيد صاحب مدونه وأخرتها
وجه معانا المدون احمد الجيزاوى صاحب مدونه بحبك يامصر
ومن هنا بشكره شكر كتير لأن جه وصلنا
فشكر ليك ياعم احمد

دى صورة برا الساقيه

المهم

قطعنا التذكرة وقعدين مستنين لقينا ابو دومه داخل وشيل شويه شنطه ... اصله كان مسافر وانا قلت له تيجى علشان فى شعراء وليله أدبيه وهو اصلا شاعر فبحب الحاجات دى
دى التذكرة أم عشرة جنيه

سألته
فين يادومه الكاميرا؟؟؟
طلع دومه الكاميرا
بنبص لقينا الفنان وجدى العربى داخل فقلنا نصورة
فاخد باله راح مشاور لنا
قلنا نسلم ونتصور معاه
انا ودومه ووجدى العربى
المهم
بدأت الحفله
وبدأ الفنان الروش مصطفى محمود فى الغنا
بجد روش يعنى تشوفه مش تقول دا منشد ولا حاجه
تقول دا مطرب 2008
طبعا بنهزر
بس اقصد النيو لوك بتاع مصطفى كان لذيذ شويه
بلطوا اسمر وبلوفر اسمر وبنطلون اسمر وجزمه سمرا وشعر اسمر
مفيش غير ضحكته البيضا الجميله
هى اللى كانت منور الدنيا

ولسه الحفله بتبدأ
بنبص مين اللى داخل
استاذنا الاستاذ عمرو خالد داخل الحفله .. فى الوقت دا لا تتخيل سعادة الحضور وسعادة الفنان مصطفي محمود والفريق بوجود الاستاذ عمرو خالدعمرو خالد ووجدى العربى في مقدمه الحضور

ودى بالنسبه لى تعتبر أول مرة أشوف فيها الاستاذ عمرو خالد مع أنه نزل عندنا المنصورة كتير . وطبعا فرصه نسلم على استاذنا ونوصل له سلام صناع المنصورة وسلام أمى له . وصراحه رأيت فى عينه سعاده كبيرة لما عرف انى من صناع المنصورة

المهم
الحفله شغاله
ومصطفى محمود بيطلب من الاستاذ عمرو خالد وبيسأله عاوز تسمع ايه؟؟

قال له الاستاذ عمرو .. سمعنا قلب كبير ... صناع الحياة

وبدأ الفنان يطربنا وصراحه شوفت تفاعل من الجمهور الذى طبعا لا يقارن بجمهور المطربين الاخرين بشىء

لكن يكفيك واحد يامصطفى يقطع المسافات والساعات من السفر ويأتى ليسمع صوتك

مش لأن مصطفى حد معدى ومفيش زيه .. لا طبعا لأن مصطفى بيقدم حاجه بتحترمنى وتقدر مشاعرى

على كل حال

انا واصحابى من المدونين لا تتخيلوا مدى استمتعنا بالحفله كان قد ايه

طبعا كان فاصل شعرى ممتاز من الشاعر صلاح جلال
الشاعر الجميل صلاح جلال

قال فيه قصيدة لغزة وللحصار وقال مجموعه من القصائد الاخرى ان شاء الله نرفعها لكم صوت وصورة تستمتعوا بها

غير كدا كان فيه شاعرة امتعت الحضور بشعر عن رسول الله صلى الله عليه وسلم

الشاعرة : زينات القليوبى تلقى قصيدة لرائعة فى حب النبى صلى الله عليه وسلم

وغنى ايضا الفنان الشاب أحمدعز
احمد عز .. بس كان نفسى يغنى من غير الديجى اللى كان جايبه دا

وأحب اقول فى النهايه شويه ايجابيات شوفتها وايضا شويه سلبيات ياعمو مصطفى

الايجابيات
نيو لوك جديد وحلو للفنان مصطفى جميل
اغانى جديدة سمعتها لم اسمعها من قبل لا فى شرايط ولا فى سيدى للفنان مصطفى
فريق موسيقى متكامل
مقدم للحفل متمكن
تفاعلك من الحضور
وجود الفنان وجدى العربى
وجود الاستاذ عمرو خالد
التذكرة مش غاليه – عشرة جنيه بس يعنى مش حق نص كيلو لحمه –
القاعه مناسبه ومجهزة بكل الامكانيات



السلبيات

توقيت الحفله غير مناسب بالمرة والكل عارف كل الشباب مطحون فى الامتحانات واللى خلص بيتفرج على الكورة

طبيعى على اساس النقطه اللى فاتت العدد مكنش قد اللى فى دماغى او اللى كنت متخيله او العدد اللى المفروض يهتم بالفن الراقى والهادف بس تعرف زى ما قلت لك لو واحد حضر لك يكفيك

( مش معنى كدا ان العدد كان بسيط لا ماشاء الله كان كويس جدا ومتفاعل ومبسوط جدا بس انا بقول كان نفسى يبقى اكتر كان نفسى اشوف الناس واقفه مش الكل قاعد يلا خير )

التورته البلاستك ياعم مصطفى الله يسامحك كنا على لحم بطننا وجايين لك من المنصورة

( طبعا بهزر )

ليه كانوا بيقولوا لنا ممنوع التصوير ولو هو دا المتعارف عليه ياريت يامصطفى لو نعرف ناخد منك سيدى الحفله نفعها عندنا

اهو دعايه ببلاش


دولى بس شويه صور على الماشى واحب اقول بس انى كتبت البوست فى وقت صعب شويه او نزلته فى وقت حصار غزة بس لا نملك سوى ان نقول
حسبنا الله ونعم الوكيل









لحظه جميله جدا للفنان مصطفى محمود وفريق الوعد


دا بقى ابو دومه والله فكرنى ببتوع امن الدوله لما بيصوروا المتظاهرين

أحب بس اقول ان أنا بقول رأى... مش اكتر
لكن أحب اقول لمصطفى محمود
انت فنان

سلام